ތަޢާރަފް

މި ޖަލްސާގެ ރިޔާސަތު ބެލެހެއްޓެވީ ކޮމިޝަނުގެ ރައީސް މުޙައްމަދު ޒާހިދެވެ. މި ޖަލްސާގައި ކޮމިޝަނުގެ 5 މެންބަރުން ބައިވެރިވެ ވަޑައިގެންނެވިއެވެ. އެއީ ކޮމިޝަނުގެ ރައީސް މުޙައްމަދު ޒާހިދު، ކޮމިޝަނުގެ ނައިބު ރައީސް ޢަބްދުއްރަޙްމާން ޞަލާޙް ރަޝީދު، މެންބަރު ޑޮކްޓަރު މުޙައްމަދު ޒާހިރު، ކޮމިޝަނުގެ މެންބަރު ޙަސަން ޒަކަރިއްޔާ އަދި ކޮމިޝަނުގެ މެންބަރު ޢަބްދުލްޙަސީބު އިސްމާޢީލް އެވެ.

 

މި ޖަލްސާގައި ނިންމާފައިވާ ނިންމުންތައް ތިރީގައި މިވަނީއެވެ.

  1. ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 8 ވަނަ އިޞްލާޙު ގެނައުމުގެ ބިލަށް ރައްޔިތުންގެ ޚިޔާލު ހޯދުމުގެ ޢާންމު ވޯޓެއް ނެގުމަށްޓަކައި، ރައީސުލްޖުމްހޫރިއްޔާގެ ޤަރާރު ނަންބަރު:2026/2 އެއްކަރުދާސްކޮށް، ރައީސުލްޖުމްހޫރިއްޔާގެ އޮފީހުން މިކޮމިޝަނަށް ފޮނުއްވާފައިވާ އެ އޮފީހުގެ ނަންބަރު:1-LAO/38/2026/1 (16 ފެބުރުވަރީ 2026) ސިޓީއާ ގުޅޭ

2026 ފެބުރުވަރީ މަހުގެ 10 ވަނަ ދުވަހު ބޭއްވެވި ރައްޔިތުންގެ މަޖިލީހުގެ 2026 ވަނަ އަހަރުގެ ފުރަތަމަ ދައުރުގެ 2 ވަނަ ޖަލްސާއިން ފާސްކުރައްވައިފައިވާ "ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 8 ވަނަ އިޞްލާޙު ގެނައުމުގެ ބިލު" ރައީސުލްޖުމްހޫރިއްޔާ ތަޞްދީޤުކުރެއްވުމުގެ ކުރިން، އެ ބިލުގައި ހިމެނޭ އިޞްލާޙުތަކަކީ، ރައީސުލްޖުމްހޫރިއްޔާ އެ ބިލު ތަޞްދީޤުކުރެއްވުމުގެ ކުރިން، ޤާނޫނުއަސާސީއަށް އެ އިޞްލާޙުތައް ގެނައުމަށް ރައްޔިތުން ރުހޭތޯ ބެލުމަށް ރައްޔިތުންގެ ޚިޔާލު ހޯދުމުގެ ޢާންމު ވޯޓެއް ނެގުމަށް ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 262 ވަނަ މާއްދާގެ (ށ) ގެ ދަށުން އަދި ޤާނޫނު ނަންބަރު 2025/15 (ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމުގެ ޤާނޫނު) ގެ 5 ވަނަ މާއްދާގެ (ހ) ގެ ދަށުން ރައީސުލްޖުމްހޫރިއްޔާއަށް ލާޒިމުކޮށްފައިވާ އިޞްލާޙުތަކެއް ކަމުގައިވާތީ، އެ ބިލު ތަޞްދީޤުކުރެއްވުމުގެ ކުރިން، އެ އިޞްލާޙު ގެނައުމަށް ރައްޔިތުން ރުހޭތޯ ބެލުމަށްޓަކައި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 262 ވަނަ މާއްދާގެ (ށ) ގެ (2) ވަނަ ނަންބަރާއި، ޤާނޫނު ނަންބަރު 2025/15 (ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމުގެ ޤާނޫނު) ގެ 5 ވަނަ މާއްދާގެ (ހ) ގައިވާ ގޮތުގެމަތީން ރައީސުލްޖުމްހޫރިއްޔާ އެކަށައަޅުއްވާފައިވާ ޤަރާރު ނަންބަރު 2026/2 (ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 8 ވަނަ އިޞްލާޙު ގެނައުމުގެ ބިލަށް ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުން) އެ ޤާނޫނުގެ 9 ވަނަ މާއްދާގައިވާ ގޮތުގެމަތީން ވޯޓުނެގުމުގެ ކަންކަން ކުރިއަށް ގެންދިއުމަށްޓަކައި، ރައީސުލްޖުމްހޫރިއްޔާގެ ޤަރާރު ނަންބަރު 2026/2  އެއްކަރުދާސްކޮށް، ރައީސުލްޖުމްހޫރިއްޔާގެ އޮފީހުން މިކޮމިޝަނަށް ފޮނުއްވާފައިވާ އެ އޮފީހުގެ ނަންބަރު1-LAO/38/2026/1 (16 ފެބުރުވަރީ 2026) ސިޓީއާ ޙަވާލާދީ، ރައީސުލްޖުމްހޫރިއްޔާގެ ޤަރާރު ނަންބަރު 2026/2 ގައިވާ ގޮތުގެމަތީން، ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 އާއެކު، 2026 އެޕްރީލް 04 ވާ ހޮނިހިރު ދުވަހު ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 8 ވަނަ އިޞްލާޙު ގެނައުމުގެ ބިލަށް ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމަށް، ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމާ ގުޅިގެން ބޭއްވެވި 04 ވަނަ ޚާއްޞަ ޖަލްސާ ގައި، ކޮމިޝަނުން ވަނީ ނިންމަވައިފައިއެވެ.

 

އިސްވެ ދެންނެވުނު ނިންމެވުމާ ގުޅިގެން، ތިރީގައި މިދަންނަވާ ކަންކަން، ބަޔާންކޮށްފައިވާ ގޮތުގެމަތީން ތަންފީޛުކުރުމަށްވެސް، ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމާ ގުޅިގެން ބޭއްވެވި 04 ވަނަ ޚާއްޞަ ޖަލްސާ ގައި، ކޮމިޝަނުން ވަނީ ނިންމަވައިފައިއެވެ.

 

ތަންފީޛުކުރަންޖެހޭނެ ކަމަށް ނިންމަވައިފައިވާ ކަންކަން

• ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 8 ވަނަ އިޞްލާޙު ގެނައުމުގެ ބިލަށް ރައްޔިތުންގެ ޚިޔާލު ހޯދުމުގެ ޢާންމު ވޯޓު، ރައީސުލްޖުމްހޫރިއްޔާގެ ޤަރާރު ނަންބަރު 2026/2 ގައިވާ ގޮތުގެމަތީން، (ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 އާއެކު)، 2026 އެޕްރީލް 04 ވާ ހޮނިހިރު ދުވަހު ބޭއްވުމަށްޓަކައި އެކަން ޢާންމުކޮށް އަންގާ އިޢުލާންކުރުން.

 

• ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 ބޭއްވުމަށްޓަކައި މިކޮމިޝަނުން ކުރަންޖެހޭ އެންމެހާ ކަންކަން ކުރިއަށްދަނީ އިންތިޚާބުތަކާ ބެހޭ ޢާންމު ޤާނޫނާއި، އެ ޤާނޫނުގެ ދަށުން އެކުލަވާލާފައިވާ ގަވާއިދުތަކާ އެއްގޮތްވާ ގޮތުގެމަތީން ކަމުގައިވާތީ، ރައްޔިތުންގެ ޚިޔާލު ހޯދުމުގެ ޢާންމު ވޯޓެއް ބޭއްވުމަށްޓަކައިވެސް މިކޮމިޝަނުން ޢަމަލުކުރާންޖެހޭނީ އިންތިޚާބުތަކާ ބެހޭ ޢާންމު ޤާނޫނާއި، އެ ޤާނޫނުގެ ދަށުން އެކުލަވައިލައިފައިވާ ގަވާއިދުތަކާ އެއްގޮތްވާ ގޮތުގެމަތީން ކަމުގައިވާތީއާއި، އުޞޫލެއްގެ ގޮތުން އިންތިޚާބެއް އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓެއް ބޭއްވުމަށްޓަކައި އިދާރީގޮތުން މިކޮމިޝަނުން ފުރިހަމަކުރަންޖެހޭ ކަންކަން ކުރުމުގައި ޤާނޫނީ ފުށުއެރުންތަކެއް ނެތަތީވެ، މިހާރުވެސް ޢަމަލުކުރަމުންދާ ގޮތުގެމަތީން، ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 ބޭއްވުމަށްޓަކައި މިކޮމިޝަނުން ޢަމަލުކުރަމުންދާ އުޞޫލުތަކާ އެއްގޮތްވާ ގޮތުގެމަތީން، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 8 ވަނަ އިޞްލާޙު ގެނައުމުގެ ބިލަށް ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމުގެ އެންމެހާ އިދާރީ ކަންކަން ފުރިހަމަކުރުން.

 

• މިގޮތުން، ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 ގެ ވޯޓުދިނުމުގެ ޙައްޤު ލިބިގެންވާ މީހުންގެ ރަޖިސްޓަރީ ޢާންމުކޮށްފައިވަނީ، 2026 އެޕްރީލް 04 ވާ ހޮނިހިރު ދުވަހު 18 އަހަރު ފުރިހަމަވާ ދިވެހި ރައްޔިތުން ހިމެނޭހެންކަމުގައިވާތީ،  2026 އެޕްރީލް 04 ވާ ހޮނިހިރު ދުވަހު  ބޭއްވޭ ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމަށްވެސް ބޭނުންކުރާންވާނީ، ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 ގެ ބޭނުމަށް ޢާންމުކޮށްފައިވާ ވޯޓުދިނުމުގެ ޙައްޤު ލިބިގެންވާ މީހުންގެ ރަޖިސްޓަރީ ކަމުގައި ކަނޑައެޅުން.

 

• އެހެންނަމަވެސް، ވީހާވެސް ގިނަ ބަޔަކަށް ވޯޓުލުމުގެ ފުރުޞަތު ފަހިކުރުމުގެ ގޮތުން، ވޯޓުލާން ރަޖިސްޓަރީވެފައިވާ ތަން ނޫން އެހެން ތަނަކަށް ވޯޓުލުމަށްޓަކައި ރަޖިސްޓަރީވުމުގެ ފުރުޞަތު 2026 ފެބުރުވަރީ 18 ވާ ބުދަ ދުވަހުގެ ހެނދުނު 10:00 އިން ފެށިގެން 2026 ފެބުރުވަރީ 22 ވާ އާދީއްތަ ދުވަހުގެ މެންދުރުފަހު 3:00 ގެ ނިޔަލަށް ހުޅުވާލުމަށް ނިންމުން.

 

• މިގޮތަށް ހުޅުވާލި ކަމުގައިވީނަމަވެސް، މި މުއްދަތުގެ ތެރޭގައި 1447 ވަނަ އަހަރުގެ ރަމަޟާން މަހުގެ ފުރަތަމަ ދުވަސް ދީމާވާތީވެ، މި ދުވަހަކީ، މިކޮމިޝަނަށް ބަންދުދުވަހެއް ކަމުން، މި ދުވަހު ރީ-ރަޖިސްޓްރޭޝަނާ ގުޅުންހުރި އެއްވެސް އިދާރީ މަސައްކަތެއް ނުކުރާނެކަމަށް ނިންމުން.

 

• މީގެއިތުރުން، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 8 ވަނަ އިޞްލާޙު ގެނައުމުގެ ބިލަށް ރައްޔިތުންގެ ޚިޔާލު ހޯދުމުގެ ޢާންމު ވޯޓު، ރައީސުލްޖުމްހޫރިއްޔާގެ ޤަރާރު ނަންބަރު 2026/2 ގައިވާ ގޮތުގެމަތީން، (ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 އާއެކު)، 2026 އެޕްރީލް 04 ވާ ހޮނިހިރު ދުވަހު ބޭއްވޭއިރު، މި ވޯޓާ ގުޅިގެން ޢާންމުން ހޭލުންތެރިކުރުވުމަށްޓަކައި ޚާއްޞަ ޕްރޮގްރާމުތަކެއް ކުރިއަށް ގެންދިއުމަށް ނިންމުން.

 

• އަދި، ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 އަށް ބޭނުންކުރުމަށް މީގެކުރީން މި ކޮމިޝަނުން ފާސްކޮށްފައިވާ ނަން، "ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓު 2026" ގެ ގޮތުގައި ފާސްކޮށް، މީގެފަހުން ބޭނުންކުރާ ހުރިހާ ލިޔެކިޔުމެއްގައި، މި ދެންނެވުނު ގޮތުގެމަތީން، ބޭނުންކުރުމަށް ނިންމުން.