ތަޢާރަފް

މި ޖަލްސާގެ ރިޔާސަތު ބެލެހެއްޓެވީ ކޮމިޝަނުގެ ރައީސް ފުއާދު ތައުފީޤް އެވެ. ޖަލްސާގައި ކޮމިޝަނުގެ 4 މެންބަރުން ބައިވެރިވެ ވަޑައިގެންނެވިއެވެ. އެއީ ކޮމިޝަނުގެ ރައީސް ފުއާދު ތައުފީޤް، ކޮމިޝަނުގެ ނައިބު ރައީސް ޢަލީ ނަޝާޠު، އަދި ކޮމިޝަނުގެ މެންބަރު މުޙައްމަދު ޢާޞިފް އަދި ކޮމިޝަން މެންބަރ ޙަސަން ޒަކަރިއްޔާ އެވެ. 

ކޮމިޝަނުގެ މެންބަރ ޑޮކްޓަރު މުޙައްމަދު ޒާހިރު ހުންނެވީ ސަލާމުގައެވެ.

 

މި ޖަލްސާގައި ނިންމާފައިވާ ނިންމުންތައް ތިރީގައި މިވަނީއެވެ.

 

1. ބިލެތްދޫ ދާއިރާއާ ގުޅޭގޮތުން ހުށަހަޅާފައިވާ ޝަކުވާއާގުޅޭ.

ރައްޔިތުންގެ މަޖިލީހުގެ އިންތިޚާބުގައި ބިލެތްދޫ ދާއިރާގެ ވަގުތީ ނަތީޖާއަށް ބަލާއިރު ދިވެހިރައްޔިތުންގެ ޑިމޮކްރެޓިކް ޕާޓީގެ ކެންޑިޑޭޓް އަޙްމަދު ޙަލީމަށް އެދާއިރާގެ ވަގުތީ ނަތީޖާއިން ދައްކާގޮތުން ކުރި ހޯދާފައިވާ ކެންޑިޑޭޓާދެމެދު ހުރި ތަފާތަކީ 9 ވޯޓުގެ ފަރަގުކަމަށްވާތީއާއި، ބާޠިލު ވޯޓުގެ ޢަދަދަކީ 72 ވޯޓުކަމަށްވާތީއާއި އޭގެއިތުރުން އެ ދާއިރާގެ ވޯޓުފޮށިތައް ގުނަމުންދިޔައިރު ބާޠިލުކަމަށް ނިންމި ބައެއް ވޯޓުކަރުދާސްތަކުގެ ޝަކުވާ އެވަގުތު އެ ވޯޓުފޮށްޓާއި ޙަވާލުވެހުރި ވެރިޔާއާއި ކޮށްފައިވުމާއެކު، އެ ދާއިރާގެ ނަތީޖާއަށް ބަލާއިރު 2 ކެންޑިޑޭޓުންނަށް ލިބުނު ވޯޓުގެ ފަރަގަކީ 9 ވޯޓުކަމަށްވެފައި ބާޠިލު ވޯޓުގެ ގޮތުގައި 72 ވާއިރު މި ނަތީޖާއަކީ އެ ދާއިރާގެ ޖުމުލަ ނަތީޖާއަށް ބަދަލު އައުމުގެ އިހްތިމާލު އޮތްކަމަށް ދެކިގެން ޤައުމީ ކޮޕްލެއިންޓްސް ބިއުރޯއަށް ހުށަހަޅާފައިވާ ޝަކުވާއަށް ބަލާއިރު، ހެކީގެ ގޮތުގައި މިމައްސަލައަށް އެއްވެސް ހެއްކެއް ހުށަހަޅާފައިނުވުމާއި، ޤައުމީ ކޮމްޕްލެއިންޓްސް ބިއުރޯއިން ބިލެތްދޫ ދާއިރާގެ ވޯޓުފޮށިތަކުގެ ކަންހިނގައިދިޔަ ގޮތުގެ ރިޕޯޓުތަކުގައި އެކަމާގުޅޭގޮތުން ޝަކުވާއެއް ހުށަހެޅިފައިވާކަމަށް ފެންނަންނެތުމާއިއެކު، މި ދާއިރާގެ ވޯޓުކަރުދާސް އަލުން ގުނަންޖެހޭ ޙާލަތެއް އޮތްކަމަށް ނުފެންނަކަމަށް އިންތިޚާބާ ގުޅިގެން ބޭއްވި 473 ވަނަ ޚާއްޞަ ޖަލްސާގައިވަނީ ނިންމަވާފައެވެ.