ހުރިހާ ޚަބަރެއް
ޚަބަރު 1 މިނެޓުގެ ކިޔުމެއް

އޭ-ވެބްގެ އެގްޒެކެޓިވް ބޯޑުގައި އިލެކްޝަންސް ކޮމިޝަނުން އަދާކުރި 4 އަހަރުގެ ދައުރު ނިންމާލައިފި

 

އެސޯސިއޭޝަން އޮފް ވަރލްޑް އިލެކްޝަން ބޮޑީސް (އޭ-ވެބް) ގެ އެގްޒެކެޓިވް ބޯޑުގައި އިލެކްޝަންސް ކޮމިޝަނުން ފުރިހަމަކުރި 4 އަހަރުގެ ދައުރު، 2026 އޮކްޓޫބަރު 14 ގައި ނިންމާލައިފިއެވެ. މި ދައުރު ނިންމާލާފައިވަނީ ފިލިޕީންސްގެ މެޓްރޯ މެނީލާގައި ބޭއްވުނު އޭ-ވެބްގެ 7 ވަނަ ޖެނެރަލް އެސެމްބްލީގައެވެ.

 

އޭ-ވެބްގެ އެގްޒެކެޓިވް ބޯޑަށް މި ކޮމިޝަން ފުރަތަމަ އިންތިޚާބުވެފައިވަނީ، 2022 އޮކްޓޫބަރު 19 ގައި ސައުތު އެފްރިކާގެ ކޭޕް ޓައުންގައި ބޭއްވި އެ ޖަމްޢިއްޔާގެ 5 ވަނަ ޖެނެރަލް އެސެމްބްލީގައެވެ. އިލެކްޝަންސް ކޮމިޝަނުން މި މަޤާމުގައި ވިދިވިދިގެން ދެ ދައުރު ފުރިހަމަކުރުމަށްފަހު ވަކިވެފައިވަނީ، އެއްވެސް މެންބަރު އިދާރާއަކަށް އެގްޒެކެޓިވް ބޯޑުގައި ވިދިވިދިގެން އަދާކުރެވޭނީ ގިނަވެގެން ދެ ދައުރު ކަމަށް އޭ-ވެބްގެ ޗާޓަރުގެ 15.2.2 ވަނަ މާއްދާގައި ބަޔާންކޮށްފައިވާތީއެވެ.

 

އޭ-ވެބް ޗާޓަރުގެ 15.3 ވަނަ މާއްދާގައިވާ ގޮތުން، އެގްޒެކެޓިވް ބޯޑުގެ މައިގަނޑު ޒިންމާތަކަކީ ޢާންމު މަޖިލީހުން ކަނޑައަޅާ ސިޔާސަތުތައް ތަންފީޒުވަމުންދާ މިންވަރު ބަލައި، އެ ޖަމްޢިއްޔާގެ އިދާރީ އަދި ހިންގުމުގެ އެންމެހައި ކަންކަން ހަރުދަނާކަމާއެކު ކުރިއަށްދާކަން ކަށަވަރުކުރުމެވެ. މީގެއިތުރުން، އެ ޖަމްޢިއްޔާއިން ހިންގާ މަޝްރޫޢުތަކާއި ޙަރަކާތްތަކުގެ ބަޖެޓް މުރާޖަޢާކޮށް ފާސްކުރުމާއި، މާލީ ކަންކަން ބަލަހައްޓައި ކޮންޓްރޯލްކުރުމާއި، ޗާޓަރަށް ގެނެވޭ އިޞްލާޙުތަކަށް ރުހުންދިނުން މި ބޯޑުގެ މަސްއޫލިއްޔަތުތަކުގެ ތެރޭގައި ހިމެނެއެވެ. އަދި ސެކްރެޓޭރިއަޓްގެ ގަވާއިދުތަކާއި އުޞޫލުތައް އެކަށައެޅުމުގެ އިތުރުން، އެސޯސިއޭޝަންގެ މަޤްޞަދުތައް ޙާޞިލުކުރުމަށްޓަކައި ޢާންމު މަޖިލީހަށް ބޭނުންވާ ލަފަޔާއި އިރުޝާދު ދިނުމަކީވެސް މި ބޯޑުން އަދާކުރާ މުހިއްމު ދައުރެކެވެ. މީގެއިތުރުން، އޭ-ވެބްގެ މަޤްޞަދުތައް ޙާޞިލުކުރުމަށްޓަކައި އެކުލަވާލަންޖެހޭ ކޮމިޓީތައް އުފެއްދުމާއި، މުހިއްމު ނިންމުންތައް ނިންމުމުގައިވެސް މި ބޯޑުން އިސް ދައުރެއް އަދާކުރެއެވެ.

 

އޭ-ވެބް އުފެދުނު 2013 ވަނަ އަހަރުން ފެށިގެން ދިވެހިރާއްޖޭގެ އިލެކްޝަންސް ކޮމިޝަނަކީ އެ ޖަމްޢިއްޔާގައި ވަރަށް ޙަރަކާތްތެރި މެންބަރެކެވެ. އެގޮތުން، އިންތިޚާބީ އިދާރާތަކުގެ މެދުގައި އޮންނަ ބައިނަލްއަޤްވާމީ ގުޅުން ބަދަހިކުރުމަށާއި، ދުނިޔޭގެ އެކި ކަންކޮޅުތަކުގައި އިތުބާރު ހުރި، ދެފުށް ފެންނަ އަދި އެންމެންގެ ބައިވެރިވުން އެކުލެވޭ އިންތިޚާބީ ނިޒާމުތަކެއް ޤާއިމުކުރުމަށް އެ ޖަމްޢިއްޔާއިން ކުރަމުންދާ މަސައްކަތްތަކަށް ކޮމިޝަނުން އަބަދުވެސް އަންނަނީ ފުރިހަމަ އެއްބާރުލުން ދެމުންނެވެ.

 

އެގްޒެކެޓިވް ބޯޑުގައި އިލެކްޝަންސް ކޮމިޝަނުން އަދާކުރި 4 އަހަރުގެ ދައުރު، 14 އޮކްޓޫބަރު 2026 ގައި ބޭއްވި އޭ-ވެބްގެ 7 ވަނަ ޢާންމު މަޖިލީހާއެކު ރަސްމީކޮށް ނިމުމަކަށް އައިއިރު، މި ބައްދަލުވުމުގައި ކޮމިޝަނުގެ ފަރާތުން ބައިވެރިވެވަޑައިގެންނެވީ، ކޮމިޝަންގެ ރައީސް މުޙައްމަދު ޝަކީލާއި މެންބަރު ޙަސަން ޒަކަރިއްޔާއެވެ.