ސިޔާސީ ޕާޓީތަކާއި މިކޮމިޝަނާ ދެމެދު ބާއްވަމުން ގެންދާ ސިލްސިލާ ބައްދަލުވުންތަކުގެ ބާރަ ވަނަ ބައްދަލުވުން މިއަދު މިކޮމިޝަނުގެ ޖަލްސާކުރާ މާލަމުގައި ވަނީ ބޭއްވިފައެވެ. މިގޮތުން 2010 ފެބްރުއަރީ 24 ވީ ބުދަ ދުވަހު (މިއަދު) ބައްދަލުކުރީ އިސްލާމިކް ޑިމޮކްރެޓިކް ޕާޓީގެ ބޭފުޅުންނާއެވެ. މިސިލްސިލާގެ ދަށުން މާދަމާ ބައްދަލުކުރުމަށް ހަމަޖެހިފައިވަނީ ސޯޝަލް ލިބަރަލް ޕާޓީއާއެވެ. މާދަމާގެ ބައްދަލުވުމަކީ މިސިލްސިލާގެ އެންމެ ފަހުގެ ބައްދަލުވުމެވެ.
މިބައްދަލުވުންތަކުގެ މަޤްޞަދަކީ ސިޔާސީ ޕާޓީތައް ހިންގުމުގައި ޕާޓީތަކަށް ދިމާވާ ދަތިތަކާއި، ކުރިމަތިވެފައިވާ ގޮންޖެހުންތަކަކީ ކޮބައިކަން ދެނެގަނެ، ޕާޓީތަކާއި އިލެކްޝަންސް ކޮމިޝަނާ ގުޅިގެން ޤައުމަށް އެންމެ ފައިދާބޮޑު ގޮތަކަށް ސިޔާސީޕާޓީތަކަށް ޙަރަކާތްތެރިވެވޭނެ ގޮތްތަކަކީ ކޮބައިކަން ދެނެގަތުމެވެ. މި ސިލްސިލާ ބައްދަލުވުންތައް 25 ފެބްރުއަރީއާ ހަމަޔަށް ދެމިގެންދާނެއެވެ.