ދިވެހިރާއްޖޭގެ ޖުމްހޫރިއްޔާގެ ޤާނުނު އަސާސީގެ އިންތިޤާލީ ކަންތައްތަކާބެހޭ ބާބުގެ 276 މާއްދާގައިވާ ގޮތުގެމަތީން އުފެދިފައިވާ އިންތިޤާލީ އިލެކްޝަންސް ކޮމިޝަން އުވި ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 167 ވަނަ މާއްދާގައި ބުނެފައިވާ އާ އިލެކްޝަންސް ކޮމިޝަން އުފެދި އެ ކޮމިޝަނަށް ރައްޔިތުންގެ މަޖިލީހުގެ ރުހުން ދެއްވާފައިވާ 5 ބޭފުޅުން އިލެކްޝަންސް ކޮމިޝަނުގެ މެންބަރުކަމަށް ރައީސުލްޖުމްހޫރިއްޔާ މިއަދު އައްޔަންކުރައްވައިފިއެވެ. އެބޭފުޅުންނަކީ އަލްފާޟިލް ފުވާދު ތައުފީޤް، އަލްފާޟިލް އަޙްމަދު ފަޔާޒް ޙަސަން، އަލްފާޟިލް އިބްރާހީމް ވަޙީދު، އަލްފާޟިލް މުޙައްމަދު ފާރޫޤް އަދި އަލްފާޟިލް ޢަލީ މުޙައްމަދު މަނިކު އެވެ.އަދި މިއަދު ވަނީ ކޮމިޝަނުގެ ރައީސް ކަމަށާއި ނާއިބުރައީސްކަމަށްވެސް ބޭފުޅުން ޢައްޔަން ކުރައްވާފައެވެ. އެ ބޭފުޅުން ކޮމިޝަނުގެ މެންބަރުކަމުގެ ހުވައި ކުރެއްވުމަށްފަހު ބޭއްވެވި ފުރަތަމަ ބައްދަލުވުމުގައި ކޮމިޝަނުގެ ރައީސް ކަމަށް ހަމަޖައްސަވާފައިވަނީ އަލްފާޟިލް ފުވާދު ތަޢުފީޤް އަދި ކޮމިޝަނުގެ ނާއިބު ރައީސްކަމުގެ މަޤާމަށް ހަމަޖެއްސެވީ އަލްފާޟިލް އަޙްމަދު ފަޔާޒް ޙަސަންއެވެ.
