ސިޔާސީ ޕާޓީތަކާއި މިކޮމިޝަނާ ދެމެދު ބާއްވަމުން ގެންދިޔަ ސިލްސިލާ ބައްދަލުވުންތަކުގެ ފުރަތަމަ ބުރުގެ އެންމެ ފަހު ބައްދަލުވުން ސޯޝަލް ލިބަރަލް ޕާޓީއާއި އެކު މިއަދު ބާއްވައިފިއެވެ.
މިބައްދަލުވުންތަކުގެ މަޤްޞަދަކީ ސިޔާސީ ޕާޓީތައް ހިންގުމުގައި ޕާޓީތަކަށް ދިމާވާ ދަތިތަކާއި، ކުރިމަތިވެފައިވާ ގޮންޖެހުންތަކަކީ ކޮބައިކަން ދެނެގަނެ، ޕާޓީތަކާއި އިލެކްޝަންސް ކޮމިޝަނާ ގުޅިގެން ޤައުމަށް އެންމެ ފައިދާބޮޑު ގޮތަކަށް ސިޔާސީޕާޓީތަކަށް ޙަރަކާތްތެރިވެވޭނެ ގޮތްތަކަކީ ކޮބައިކަން ދެނެގަތުމެވެ.
ރާއްޖޭގައި ރަޖިސްޓަރީ ކުރެވިފައިވާ 13 ސިޔާސީ ޕާޓީއާއިއެކު ބައްދަލުކޮށް ނިމުނުއިރު ޕާޓީ ތަކުގެ ހިންގުން އިތުރަށް ފުޅާކޮށް ހަރުދަނާ ކުރުމަށް ތަފާތު ގިނަ ޚިޔާލު ތަކެއް ސިޔާސީ ޕާޓީ ތަކުން ހުށަހަޅުއްވާފައި ވެއެވެ. މީގެ ތެރޭގައި ސިޔާސީ ޕާޓީތައް ހިންގުމުގެ ގަވާޢިދު އިސްލާހު ކުރަންޖެހޭކަމާއި، ސިޔާސީ ޕާޓީތަކުގެ ޤާނޫނެއް އޮތުން ވަރަށް މުހިންމުކަމާއި، ރަޖިސްޓްރޭޝަންގާ ހައްލުކުރަންޖެހޭ ތަފާތު މައްސަލަތައް ހުރިކަމާއި، އަދި ރައްޔިތުން ހޭލުންތެރި ކުރުވުމުގެ ޕުރޮގްރާމްތައް ހިންގުމަކީ މިހާރުން މިހާރަށްވެސް ކުރަންވެއްޖެ ކަމެއްކަން ޕާޓީތަކުން ފާހަގަކުރައްވާފައިވެއެވެ.
ސިޔާސީ ޕާޓީތަކާއި އެކު ބޭއްވުނު މި ބައްދަލުވުންތައް ވެގެން ދިޔައީ ވަރަށް ކާމިޔާބު، ބިނާކުރުވަނިވި ޚިޔާލު ތަކެއް ލިބުނު އަދި ސިޔާސީ ޕާޓީތަކާއި މި ކޮމިޝަނާ ދެމެދު އޮތް ގުޅުން އިތުރަށް ހަރުދަނާވެގެން ދިޔަ ބައްދަލުވުންތަކެއް ކަމުގައެވެ.
މިހާރު ހުށަހެޅިފައިވާ އިސްލާޙުތަކާއި ޚިޔާލުފުޅުތައް ދިރާސާ ކުރުމަށްފަހު އިތުރު ބައްދަލުވުންތަކެއް ސިޔާސީ ޕާޓީތަކާއިއެކު މި ސިލްސިލާގާ ކުރިއަށް ގެންދެވޭނެއެވެ.
2010 ފެބްރުއަރީ 7 ވަނަ ދުވަހުން ފެށިގެން 2010 ފެބްރުއަރީ 25 ވަނަ ދުވަހުގެ ނިޔަލަށް ކުރިއަށް ގެންދިޔަ މި ބައްދަލުވުންތައް ބޭއްވިފައިވަނީ، ކޮންމެ ދުވަހެއްގެ މެންދުރުފަހު 2:30 ން ފެށިގެން އެއްގަޑި އިރަށް، މިކޮމިޝަނުގެ ކޮންފަރަންސް ހޯލުގައެވެ.