ސިޔާސީ ޕާޓީތަކާއި އިލެކްޝަންސް ކޮމިޝަނާއި ދެމެދު، ސިލްސިލާ މަޝްވަރާ ބައްދަލުވުންތަކެއް މިއަދު ފަށްޓަވައިފިއެވެ.
މި ބައްދަލުވުންތަކުގެ މައިގަނޑު މަޤްޞަދަކީ ސިޔާސީ ޕާޓީތައް ހިންގުމުގައި ޕާޓީތަކަށް ދިމާވާ ދަތިތަކާއި، ކުރިމަތިވެފައިވާ ގޮންޖެހުންތަކަކީ ކޮބައިކަން ދެނެގަނެ އަދި އޭގެއިތުރުން ޕާޓީތަކާއި އިލެކްޝަންސް ކޮމިޝަނާއި ގުޅިގެން ޤައުމަށް އެންމެ ފައިދާބޮޑުގޮތަކަށް ސިޔާސީ ޕާޓީތަކަށް ޙަރަކާތްތެރިވެވޭނެ ގޮތްތަކަކީ ކޮބައިކަން އޮޅުންފިލުވުމެވެ. އަދި ރާއްޖޭގައި އޮންނަނީ ފުރިހަމަ ޑިމޮކްރަސީގެ ނިޒާމެއްކަމަށް ހެދުމަށްޓަކައި އިސް ދައުރެއް ސިޔާސީ ޕާޓީތަކުން އަދާކުރާ ހިނދު، އިލެކްޝަންސް ކޮމިޝަނަކީ މި ކަމުގެ ބައިވެރިއަކަށް ވާންޖެހުންވެސް މި މަޝްވަރާ ބައްދަލުވުންތައް ބޭއްވުމުގެ މަޤްޞަދަކަށް ވެއެވެ.
އަދި މީގެއިތުރުން މި ބައްދަލުވުންތަކަކީ ސިޔާސީ މައިދާނުގައި، ސިޔާސީ ޕާޓީތައް ޙަރަކާތްތެރިވުންމިވަނީ ވަރަށް ޅަފަތުގައިކަމަށްވާތީ، ޕާޓީތައް ހިންގުމަށް މަސްއޫލްވާ ފަރާތްތަކާއި ޕާޓީގެ އެކިއެކި ކަންކަން ބަލަހައްޓާ ފަރާތްކަމަށްވާ އިލެކްޝަންސް ކޮމިޝަނާއި ދޭތެރޭގައި އޮންނަ ގުޅުމަކީ މިހާރަށްވުރެބޮޑު ގާތްކަމެއް އޮޮންނަންޖެހޭނެ ގުޅުމެއްކަމަށް އިލެކްޝަންސް ކޮމިޝަނުން ދެކޭތީ ކޮންމެ ޕާޓީއަކާވެސް ވަކިވަކިން ބައްދަލު ކުރުމުގެ ބޭނުމުގައި ބާއްވާ ބައްދަލުވުންތަކެކެވެ.
މިއަދު މިފެއްޓި ބައްދަލުވުންތައް 2010 ފެބްރުރައީ 24 ގެ ނިޔަލަށް ދެމިގެންދާނެއެވެ. އިލެކްޝަންސް ކޮމިޝަނުގެ ކޮންފަރެންސް ހޯލްގައި ބޭއްވުނު މިއަދުގެ ބައްދަލުވުމުގައި އެންމެފުރަތަމަ ބައްދަލު ކުރެއްވީ ޤައުމީ އިއްތިހާދުގެ ބޭފުޅުންނާ އެކުގައެވެ. އަދި މާދަމާ ބައްދަލު ކުރައްވަން ހަމަޖެހިފައިވަނީ ޖުމްހޫރީ ޕާޓީގެ ބޭފުޅުންނާ ކަމުގައި އިލެކްޝަންސް ކޮމިޝަނުން މަޢުލޫމާތު ދެއްވައެވެ.
|
 |
